Dentro di poko Fundashon Mariadal ta ranka sali ku renobashon di su botika, Botika FM. E trabounan akí ta traha lugá pa un ampliashon importante di nos servisio: instalashon di un mashin pa entrega di remedi durante 24 ora pa dia. Danki na e inovashon akí, den futuro nos klientenan por bin buska nan remedinan pafó di e orarionan regular ku nos ta habrí tambe.
E renobashon ta dura mas òf ménos 10 siman. Durante e periodo akí botika ta keda habrí, pero ku un kantidat limitá di bali. Debí na esaki e tempu di espera por bira mas largu. Pa e motibu akí Fundashon Mariadal ta hasi un yamada riba tur kliente pa kontrolá nan informashonnan di kontakto – partikularmente nan number di telefòn i nan emailadrès – i kaminda ta nesesario aktualisá esakinan.
Mas komodidat, ménos tempu di espera
E mashin pa entrega di remedi durante 24 ora pa dia ta brinda nos klientenan vários bentaha. Nan por bin buska nan remedinan na un momentu ku ta kumbiní nan – durante dia òf den anochi, shete dia pa siman. Danki na un sistema akoplá di ‘track & trace’, outomátikamente usuarionan ta risibí un notifikashon, asina ku nan remedinan ta kla. Esaki ta hasi e tempu di espera na bali mas kòrtiku, e ta oumentá privasidat i e ta kontribuí na un mihó repartishon di nos bishitantenan atraves di dia. Ku esaki Fundashon Mariadal ta reakshoná riba e deseo pa un kuido aksesibel, efisiente i ku enfoke riba kliente.
Kontrolá bo informashonnan na tempu
Pa por hasi uso di e mashin pa entrega di remedi, ta esensial ku e informashonnan korekto di kontakto ta konosí serka nos. Durante un bishita na botika, via e pilá di ticket nos klientenan por skohe pa opshon J – Kontròl di Informashon. Personanan ku na e momentu ei no tin mester di bin buska remedi, tambe nos ta invitá pa kontrolá nan informashonnan di antemano. Esaki no ta solamente di importansia pa uso di e mashin ku ta na kaminda, pero e ta yuda tambe pa durante e periodo di renobashon keda sirbí mas rápidamente, asina ku e remedinan ta kla.
Huntu nos ta edifiká un kuido moderno i aksesibel.