Fundashon Mariadal ta tuma un paso importante den desaroyo di su organizashon. Entrante 1 di mei 2025, a ampliá su Hunta di Direktiva na tres miembro. Teniendo kuenta ku e ròl sentral di Fundashon Mariadal den kuido aki na Boneiru, e ampliashon aki ta kontribuí na un liderato mas fuerte i prepará pa futuro.
E komposishon nobo di e Hunta di Direktiva ta:
- Giovanni Frans – Presidente di Hunta di Direktiva
- Peter Bongers – Gerente di Operashon i Finansa
- Danny Rojer – Gerente di Kuido
Tokante e miembro nobo di direktiva
Peter Bongers ta trese kuné un eksperensia amplio den finansa i maneho di organisashon. E la traha entre otro na Ernst & Young, MCB Bank i mas resientemente komo CFO di Fundashon Kas Popular na Kòrsou.
Danny Rojer ta regresa na Fundashon Mariadal despues di okupa varios posishon di liderato i supervishon den sektor di kuido, inkluso na Hospice Kas Flamboyan, Stichting Reclassering i den e Dutch Caribbean Hospital Alliance (DCHA).
Un struktura di liderato mas Fuerte
Ku e struktura di Hunta di Direktiva ampliá, Fundashon Mariadal ta reforsando su kapasidat pa sigui realisá su kurso stratégiko. E ampliashon lo permití un maneho mas dinamiko den un sektor ku ta bira kada bes mas kompleho – na nivel lokal i regional.
Fundashon Mariadal, huntu ku su empleadonan, partnernan i komunidat, ta trahando ku konfiansa na un futuro saludabel pa Boneiru.