Riba djaluna 29 di sèptèmber 2025, Fundashon Mariadal ta organisá un dia habrí den kuadro di World Heart Day – Dia Mundial di Kurason. Entre 09:00 or i 12:00 or habitantenan di Boneiru ta bon biní na Fundashon Mariadal na Playa pa siña mas tokante salú di kurason i prevenshon.
Bishitantenan por entre otro:
- laga midi nan preshon di sanger i kontrolá nan peso, ku konseho mesora di nos spesialistanan,
- hasi pregunta na nos kardiólogonan tokante salú di kurason,
- haña tep di nos dietistanan tokante kuminda i estilo di biba saludabel,
- partisipá na un kues kòrtiku ku chèns pa gana un premio atraktivo.
Ku e dia habrí akí Fundashon Mariadal ke hasi komunidat di Boneiru konsiente di importansia di un kurason salú. Prevenshon i pasonan chikitu den estilo di biba por hasi un diferensia grandi pa futuro.
Entrada ta grátis i tur hende ta bon biní.