E preparashonnan pa instalashon di e mashin pa buska remedi durante 24 ora pa dia di Botika FM ta kasi kla. Segun ekspektativa, na fin di luna di yanüari por tuma e mashin den uso.
E inovashon akí ta hasi posibel pa buska remedi na kualke momentu deseá – na un manera seif i rápido i sin kareda di hende ta warda. Na mes momentu den e fase di finalisashon akí nos ta implementando diferente otro mehorashon, manera re-apertura di tur shete bali i ampliashon di e funshonalidatnan di ‘track & trace’.
Track & trace: mihó servisio ku kódigo pa buska remedi
For di aña 2023 e servisio di ‘track & trace’ di Fundashon Mariadal ta aktivo i awor nos ta ampli’é mas tantu. Dentro di poko nos klientenan no ta risibí solamente un mensahe ora nan remedinan ta kla, pero tambe un kódigo personal pa buska nan remedi.
Por hinka e kódigo akí den e pilá di ticket ora drenta botika. Di e manera akí nos por manehá e kantidat di hende ku ta wardando mas efisientemente i nos ta yuda nos klientenan mas rápidamente. E mensahe ta indiká si a risibí un resèpt òf ku e remedinan ta kla – den tur dos kaso nos klientenan por mèldu nan mes na bali.
Den forma standart via email bo ta risibí e mensahe pa buska bo remedinan.
Bo ta preferá di risibí un sms? E ora ei indiká esaki na bali di botika. Gustosamente nos asistentenan di botikario ta adaptá esaki den e sistema.
Paga tinu: informashon di kontakto korekto ta esensial pa hasi uso di e servisio akí. Kontrolá òf aktualisá bo informashonnan via:
- Bali di Botika FM
- Òf via email: botika-info@fundashonmariadal.org
Aworó nos ta bai hasi uso di e servisio di ‘track & trace’ akí tambe pa buska remedi via e mashin pa buska remedi durante 24 ora. Ku e kódigo pa buska remedi, na un manera fásil i independiente nos klientenan por buska nan remedinan – sin ora di espera, pafó di e oranan ku botika ta habrí tambe.
Mashin pa buska remedi durante 24 ora pa dia: su uso ta kuminsá na komienso di aña 2026
Instalashon di e mashin pa buska remedi durante 24 ora ta den su fase final. Segun espektativa for di fin di luna di yanüari nos klientenan por hasi uso di e servisio akí. Asina ku esaki ta posibel, nos ta komuniká esaki via nos kanalnan di kustumber.
Meskos ku ta e kaso ku e servisio di ‘track & trace’, informashon korekto (nòmber, adrès, lugá di biba, telefòn i email) ta un kondishon pa por hasi uso di e mashin akí.
Dentro di poko tur bali ta habrí atrobe
Dentro di poko nos ta tuma dos bali èkstra den uso, i ku esaki tur shete bali ta operashonal atrobe. Esaki ta sòru pa mas kapasidat, servisio mas rápido i un bishita mas plasentero na botika.
Hèkinan di konstrukshon ta disparsé – mas lugá pa stashoná outo ta disponibel atrobe
Dentro di poko nos ta kita e hèkinan temporal di konstrukshon. Ku esaki e lugánan di stashoná outo ku temporalmente no tabata den uso ta bira disponibel atrobe pa nos klientenan. Di e manera akí nos ta mehorá alkansabilidat di nos botika.
Orarionan ku nos ta habrí durante dianan di fiesta
Paga tinu: orarionan adaptá durante dianan di fiesta:
24 di desèmber: Habrí te 17:30 or
25 di desèmber: Será
26 di desèmber: Será
31 di desèmber: Habrí te 17:30 or
1 di yanüari: Será
Dia 25 i 26 di desèmber i 1 di yanüari e areglo di ‘stand by’/servisio di djadumingu ta na vigor. Buska bo remedinan na tempu pa evitá inkumbiniensia.
Masha danki pa bo konfiansa
Fundashon Mariadal ta gradisí tur kliente pa nan pasenshi i komprenshon durante e periodo di rekonstrukshon akí. Ku amor, profeshonalidat, servisialidat i inovashon nos ta sigui edifiká un ambiente di kuido ku ta konektá ku nesesidatnan di nos komunidat.