Den un komunidat chikitu manera esun di nos ta importante, pero ta hasi nos kontentu tambe, di mira ku asina tantu boneriano ta sinti nan mes enbolbí ku i ta hasi esfuerso tambe pa mantenshon di kuido di salú optimal i duradero na Boneiru.
Fundashon Mariadal i nos empleadonan ta komprometé nan mes 24/7/365 pa esaki. Direktiva di Fundashon Mariadal ta duna hopi balor na enbolbimentu di komunidat ku e kuido ku nos ta duna. Resientemente den medionan di komunikashon a dediká hopi atenshon na importansia di air ambulance, Kas di Kuido, botika i spesialismonan médiko.
Banda di esaki tin informenan ta alkansá nos ku lo tin un eskases grandi di bon spesialista den kuido na Boneiru. Direktiva di Fundashon Mariadal no ta kompartí e opinion akí. Al kontrario, nos por konsiderá nos mes hopi afortuná ku e nivel haltu di kuido ku nos por gosa di dje aki na Boneiru. E nivel haltu akí ta danki na vários faktor, entre otro disponibilidat di spesialistanan médiko sumamente ábil i ekselentemente kapasitá.
E kolaborashon ku Amsterdam UMC, nos personal dediká i e studiantenan di nos propio FM Academy ku kada biaha ta alkansá un nivel mas haltu, ta hasi posibel pa nos por garantisá un kalidat, disponibilidat i kontinuidat di kuido ku ta kumpli ku normanan hulandes oropeo. Nos instituto di kuido ta kai bou di supervishon direkto di Inspekshon Hulandes pa Kuido di Salú i Hubentut (Nederlandse Inspectie voor Gezondheidszorg en Jeugd – IGJ). Banda di esaki spesialistanan médiko ku ta traha mas tantu tempu na Fundashon Mariadal por biaha tur aña pa Hulanda Oropeo pa mantené nan konosementu i abilidat aktualisá.
]Konseho Insular di Entidat Públiko Boneiru a invitá direktiva di Fundashon Mariadal pa un enkuentro informativo tokante entre otro e buelonan di ambulans. Aunke Mariadal ta un instituto di kuido privá ku un relashon kontraktual ku ministerio di Salubridat Públiko, Bienestar i Deporte (ZJCN) pa kompra di kuido, direktiva di Fundashon Mariadal tin komprenshon pa e importansia ku Konseho Insular ta duna na informashon direkto. Pa e motibu akí direktiva a disidí pa aseptá e invitashon i aktualmente nos ta wardando riba un fecha pa e enkuentro informativo akí ku Konseho Insular.