Den kuadro di World Heart Day – Dia Mundial di Kurason, awe mainta Fundashon Mariadal a organisá un eksitoso dia habrí na entrada prinsipal di hòspital. Ku aktividatnan interaktivo, konseho personal i hopi interes di habitantenan i empleadonan, e mainta tabata kompletamente den signo di salú di kurason, prevenshon i konsientisashon.
Bishitantenan por a laga midi nan preshon i nan peso, pa despues di esaki mesora nan a haña konseho personal serka enfermera- i enfermeronan. Vários kardiologo i dietista tambe tabata presente pa kontestá pregunta tokante estilo di biba, alimento i faktornan di riesgo. Banda di esaki a organisá un kues di salú tokante reanimashon, moveshon i riesgo kardiovaskular.
Na un manera hopi entusiasmá partisipantenan di tur edat a yena e kues. A selektá un ganadó, ku entretantu a keda informá via telefòn. Dentro di poko ta hasi entrega di e premio – un gesto simbóliko pa enkurashamentu di konsientisashon di salú.
E aktividat pa públiko akí ta konektá ku e mishon di Fundashon Mariadal pa no solamente duna kuido, pero pa kontribuí aktivamente tambe na un komunidat salú i konsiente na Boneiru. Den esaki prevenshon i informashon ta mes importante ku tratamentu. E organisashon ta traha a base di su balornan núkleo amor, inovashon, profeshonalidat i servisialidat, ku un vishon riba kuido ku ta ‘nurse-driven, value-driven i data-driven’.
Fundashon Mariadal ta gradisí tur bishitante i empleado pa nan enbolbimentu i ta spera momentunan nobo kaminda kuido, komunidat i konsientisashon ta bini huntu.