Riba djaluna 1 di sèptèmber Fundashon Mariadal ta kuminsá ku renobashon di Botika FM. E modernisashon akí ta un paso importante den direkshon di un servisio mas rápido i mas fleksibel, ku komo punto kulminante introdukshon di un mashin pa buska remedi durante 24 ora pa dia mas lat e aña akí. Segun espektativa e trabou ta dura mas òf ménos 10 siman.
Renobashon ku bista riba aksesibilidat i komodidat
E mashin pa buska remedi durante 24 ora pa dia ta hasi posibel pa klientenan buska nan remedinan na kualke momentu ku nan ta deseá esaki – tambe pafó di e orarionan regular ku botika ta habrí. Ku esaki Fundashon Mariadal ta oumentá su aksesibilidat i servisio pa komunidat.
Adaptashon temporal durante e renobashon
Durante e trabounan, botika ta keda habrí, pero ku un kantidat mas limitá di bali:
- Bali 6 i 7 ta temporalmente for di servisio, loke por kondusí na un tempu di warda mas largu;
- Dos lugá pa stashoná outo ta kai afó temporalmente, pero e lugá pa stashoná outo pa hende ku limitashon ta keda disponibel.
Importansia di informashonnan aktual di kontakto
Pa un serviso rápido i efisiente ta importante ku e informashonnan di kliente ta aktual. Spesialmente number di telefòn i emailadrès ta nesesario pa por informá klientenan outomátikamente ora nan remedinan ta kla.
Klientenan por aktualisá nan informashonnan na un manera simpel:
- Via e pilá di ticket den botika (opshon J – Kontrolá informashon);
- Via telefòn òf na bali di botika;
- Via email: apothekers@fundashonmariadal.org
Evitá e momentunan di mas drùk
Normalmente e oranan di mas drùk na botika ta:
- 09.00 – 11.00 or
- 15.30 – 17.30 or
Nos ta konsehá klientenan, kaminda esaki ta posibel, pa plania nan bishita pafó di e oranan akí.
Kuido ku enfoke riba futuro
Ku e invershon akí Fundashon Mariadal un biaha mas ta pone un paso den direkshon di kuido moderno, sostenibel i ku enfoke riba kliente. Nos ta edifikando un ambiente di kuido ku ta konektá ku nesesidat di nos komunidat. Esaki nos ta hasi ku amor, inovashon, profeshonalidat i servisialidat komo guia.