Direktiva di Fundashon Mariadal, Giovanni Frans, ayera a duna un splikashon den Konseho Insular tokante e situashon rònt di e buelonan di air ambulance. Mariadal ke hasi tur loke ta na su alkanse pa aportá na un provishon struktural pa transporte konfiabel di pashènt ku air ambulance pa hòspitalnan den region.
Despues di un introdukshon kòrtiku tokante Fundashon Mariadal, sr Frans a dediká atenshon na e situashon rònt di e buelonan di air ambulance. Pa basta tempu kaba Mariadal tin e nesesidat pa den un forma duradero sigurá kalidat, siguridat i kontinuidat di transporte di pashènt ku air ambulance pa hòspitalnan den region. Den esaki e fundashon a aktua sumamente kouteloso i kuidadoso. Despues ku e kontrato ku Medicair a vense, e proseso akí a kondusí na e eskoho pa un otro kompania ku práktikamente tabata kumpli ku tur e eksigensianan krusial ku FM a pone òf tabata dispuesto pa kumpli ku esakinan. Ta trata akí di un akuerdo temporal pa un fase di transishon di un (1) aña.
Naturalmente, tambe pa motibu di e eksigensianan haltu ku Mariadal ta pone, ainda tabatin algun pregunta. Tabata trata akí di entre otro e derechonan pa ehekushon di buelo pa Kòrsou i Aruba. Spesífikamente tokante esaki Mariadal a buska informashon adishonal serka ekspertonan. A base di esaki Mariadal a yega na e konklushon ku e partner di kolaborashon deseá lo a haña permiso pa transportá pashènt pa nos islanan besiña durante e fase di transishon di un (1) aña. Na e momentu ei no tabatin ningun motibu pa sospechá ku esaki lo a resultá otro. Poniendo tur e informashonnan ku na e momentu ei tabata disponibel den balansa, nos tabata konbensí ku e kestion tokante derecho di aterisahe lo a keda solushoná riba término kòrtiku. Pa sòru pa nada inesperá no pasa, nos a skohe pa na mes momentu hasi un apelashon riba wes atministrativo di pais Kòrsou.
Entre tantu obligatoriamente nos tabata ehekutá buelo di ambulans pa vários hòspital na Colombia. Ora ku no a bini kambio den e situashon, den konsulta ku Kuido i Hubentut Hulanda Karibense i e Ministerio di Salubridat Públiko, Bienestar i Deporte (ZJCN/VWS) nos a sera un akuerdo ku un hòspital ku tabata keda mas pa nort na Barranquilla na Colombia. Di e manera akí por a hasi e durashon di buelo mas kòrtiku. Pero e permiso ku nos a verwagt pa por a ehekutá buelo di air ambulance pa Kòrsou i Aruba, na sierto momentu kada biaha tabata resultá mas leu for di bista. Pa ZJCN/VWS esaki tabata motibu pa, despues di konsulta, kontratá Medicair pa un periodo di dos luna. Na mes momentu ZJCN/VWS a pidi sr Arkenbout pa investigá e posibilidatnan pa realisá un solushon optimal i duradero pa e kuido di air ambulance.
Ku sr Arkenbout nos a hiba un kòmbersashon konstruktivo, kaminda nos a primintí di dun’é nos koperashon kompletu. Nos a ofresé tambe pa si e ta deseá esaki, duna un aporte aktivo na haña i duna forma na e solushon ei. Ku hopi interes nos ta spera e konklushonnan i rekomendashonnan di sr Arkenbout.
Sr Frans ta lamentá ku kosnan a kana manera el a deskribí. Mariadal ta sumamente konsiente di e preokupashonnan den komunidat, serka nos pashèntnan i nan famia, serka gobièrnu i serka nos personal ku dia den dia ‘fo ta traha duru ku alma i kuerpo. Mariadal ta sinti su mes obligá pa hasi tur loke ta na su alkanse pa kontribuí na un provishon struktural pa transporte konfiabel di pashènt ku air ambulance pa hòspitalnan den region.