Fundashon Mariadal ta informá komunidat di Boneiru ku renobashon di su botika, Botika FM, ta den fase final. Dentro di poko ta instalá e mashin nobo pa buska remedi durante 24 ora pa dia, i e ora ei e fase di tèst ta kuminsá.
Danki na e renobashon akí, aworó nos klientenan por buska nan remedi pafó di e orario regular tambe – seif, rápido i sin tempu di espera. Di e manera akí Fundashon Mariadal ta brinda mas fleksibilidat i mas komodidat, sinkronisá ku deseonan di nos komunidat.
Evitá ku ta bira drùk – skohe e momentunan mas trankil
Durante e fase final akí botika ta keda habrí, pero ku un kantidat limitá di bali. Debí na esaki e tempu di espera por bira mas tantu. Fundashon Mariadal kariñosamente ta supliká su klientenan pa – si esaki ta posibel – bini na e momentunan ku no ta hopi drùk.
Haña un sms òf un email asina ku bo remedi ta kla
Pa por hasi uso di e servisio akí, ta importante ku bo informashonnan di kontakto ta korekto i ku bo ta indiká bon kla si bo ta preferá di keda informá pa medio di sms òf pa medio di email. Na un manera simpel bo por kontrolá òf aktualisá bo informashonnan via opshon J – Kontròl di informashon na e pilá di ticket ora bo drenta botika – tambe si na e momentu ei bo no tin mester di remedi.
Paga tinu: Bo no a risibí un sms òf un email ainda?
E ora ei probablemente bo remedi no ta kla ainda. Nos ta supliká bo kariñosamente pa warda un ratu mas. Di e manera akí bo ta evitá tempu di espera innesesario pa bo mes i pa otro hende.
Masha danki pa bo pasenshi
Fundashon Mariadal ta gradisí tur su klientenan pa nan pasenshi, komprenshon i konfiansa durante e periodo di renobashon akí. ‘Huntu nos ta edifiká un kuido farmaséutiko moderno, aksesibel i ku enfoke riba kliente. Dentro di poko nos ta spera di tuma e mashin ofisialmente den servisio i naturalmente nos lo informá bo na tempu tokante esaki.’