Fundashon Mariadal ta kabando ku e último preparashonnan pa tuma e mashin pa buska remedi durante 24 ora pa dia den uso na Botika FM. E fasilidat moderno akí ta hasi posibel pa buska remedi na un momentu ku ta kumbiní nos klientenan mas – na un manera seif, rápido i sin para den rei.
Téknikamente a tèst e mashin pa buska remedi kasi kompletamente kaba i dentro di poko nos ta tum’é den uso den fase. Tan pronto ku e servisio ta disponibel, nos ta komuniká esaki atraves di e kanalnan konosí.
Kon e ta funshoná?
Asina ku e remedi ta kla, via email e kliente ta risibí un kódigo personal pa buska esaki.
E kliente ta hinka e kódigo akí riba e skrin di e mashin di buska remedi na Botika FM.
E kliente ta risibí e remedi mesora, sin tin mester di pasa na bali.
E mashin ta adekuá pa remedi di ripitishon i pa resèpt ku ta kla poné. Un kliente por duna un persona di konfiansa tambe e kódigo pa buska su remedi, manera un partner òf un persona ku ta kuid’é.
Paga tinu: klientenan mes ta responsabel pa warda i usa e kódigo na un manera seif. Den kaso di pèrdida òf maluso, botika no por akseptá ningun responsabilidat.
Solamente email – sms ta bini despues
Pa e periodo binidero nos ta manda e kódigonan pa buska remedi solamente via email. Na e momentu akí e funshonalidat di sms no ta aktivo ainda, pero nos lo añadí esaki na un momentu mas despues. Asina ku e opshon akí ta disponibel, nos ta komuniká esaki.
Sòru pa bo emailadrès korekto ta konosí na botika pa por hasi uso di e servisio di buska remedi.
Tene kuenta ku e periodo di balides
- E remedi ta keda maksimalmente 3 dia disponibel den e mashin di buska remedi.
- Despues di esei outomátikamente nos ta saka e remedi bèk.
- Ora ku vários biaha un kliente keda sin bin buska su remedi, esaki por tin influensia riba ponementu kla di e remedi di ripitishon na un manera outomátiko. Esaki ta nesesario pa evitá dispidimentu i pa mantené e sistema efisiente.
Aktualisá informashon di kontakto
Na un manera simpel por kontrolá òf adaptá informashon di kontakto:
- Na bali di Botika FM
- Òf via email: botika-info@fundashonmariadal.com
Pa klientenan ku no tin emailadrès òf ku no ta hasi uso di telefòn selular, e tratamentu regular na bali ta keda disponibel.
Masha danki pa bo komprenshon
Fundashon Mariadal ta gradisí tur kliente pa nan pasenshi i komprenshon durante e último lunanan di renobashon i inovashon di sistema. Ku e adaptashon akí nos por repartí nos servisio di botika mas mihó, bo tempu di espera ta bira mas kòrtiku i nos por brinda mas espasio na klientenan ku diferente nesesidat.
Ku e ampliashon akí Fundashon Mariadal ta sigui invertí den kuido moderno, aksesibel i ku enfoke riba kliente – basá riba amor, inovashon, profeshonalidat i servisialidat.