Djabièrnè ùltimo 12 di sèptèmber un logro importante a tuma lugá den kuido na Boneiru. Pa promé biaha a prepará tratamentu di kimoterapia kompletamente na Boneiru, i a apliká esakinan den un ‘setting’ ofisial na Fundashon Mariadal. Ku esaki pashèntnan ku tin mester di kimoterapia no tin mester di biaha bai Aruba òf Kòrsou mas, pero nan por haña nan tratamentu den un ambiente konfiá i no leu for di nan famianan i amigunan.
Durante periodo di COVID den situashonnan di emergensia ya kaba sa apliká kimoterapia lokalmente ku tratamentunan ku nan tabata trese ku avion. E diferensia ta ku for di awor e tratamentu por tuma lugá na un manera struktural i seif na Boneiru mes, den e tratamentu durante dia di onkologia di Fundashon Mariadal.
Kuater protokòl di tratamentu ta disponibel
Aktualmente tin kuater protokòl di tratamentu lokalmente disponibel pa diferente tipo di kanser: kanser di pechu, kanser di tripa, kanser di pròstat i kanser gineakológiko. Botika ta prepará e tratamentunan na un manera seif i e enfermeranan di onkologia, ku ta ehersé un ròl sentral komo ‘casemanager’ i promé punto di kontakto pa nos pashèntnan, ta apliká nan.
Preparashon di hopi aña
Realisashon di e desaroyo akí ta resultado di un preparashon i kolaborashon di hopi aña. Un danki spesial ta bai na e enfermeranan di onkologia di Fundashon Mariadal, e Internista- Onkólogo Daniel Souwer, e botikario Kevin Schwengle i Renee Grouls i su koleganan di Catharina Ziekenhuis na Hulanda, ku a duna un aporte krusial na e preparashonnan i na strukturashon di nos botika. Partnernan eksterno, manera Amsterdam UMC, tambe a hunga un ròl importante na momentu di formulashon di e protokòlnan i e garantia di kalidat.
Un logro importante pa kuido na Boneiru
Ku inisio ofisial di kimoterapia na Boneiru, Fundashon Mariadal ta pone un paso importante padilanti den kuido onkológiko. Esaki no ta nifiká solamente un alivio pa nos pashèntnan i nan famianan, pero tambe un fortifikashon di kapasidat i kalidat di kuido na nos isla.
Tokante Fundashon Mariadal
Fundashon Mariadal ta e instituto di kuido di mas grandi na Boneiru i ta ofresé un espektro amplio di servisio médiko i di sosten. A base di e balornan núkleo: amor, inovashon, profeshonalidat i servisialidat, i e pilánan stratégiko: ‘nurse-driven’, ‘data-driven’ i ‘value-driven’, Mariadal ta trahando pa logra un kuido di balor haltu i resiliente pa futuro pa nos komunidat.